"Tuot las müdadas chi quintan van be planet. Hoz intant hast
fat ün bun pass, figl " disch duonn Aita Tach a seis figl
Tumasch. Cun la famiglia Tach e la figüra principala dal giuven
Tumasch ans descriva Cla Biert il muond pauril da la prüma mità dal
20avel tschientiner vers il temp da la modernisaziun, cur cha
bleras müdadas han marcà regiuns muntagnardas sco quella da
Saluorn. "La müdada" da Cla Biert es il prüm grond roman
rumantsch, ingio chi vain quintada intretschada illa descripziun da
la regiun paurila i l temp da seis müdamaints radicals l istorgia d
amur da Tumasch e Karin, la giuvna danaisa in vacanzas i l nöbel
hotel sper il cumün.
L ouvra da Cla Biert es üna bellischma éducation sentimentale, ün
chapitel socioistoric ed üna spüerta per minchün chi tschercha l
experienza dal profuond plaschair da la lectüra. Trenta ons davo
sia mort vain l important autur ladin Cla Biert onurà cun üna nouva
ediziun da seis cheudouvra "La müdada".
Cla Biert (1920-1981) es nat e creschü sü a Scuol, ha frequentà il seminar da magisters a Cuoira, stübgià a l'Università da Turich ils roms fil. I da magister secundar ed ha tgnü scoula il prüm in Engiadina, a partir dal 1956 fin a sia pensiun a Cuoira. Biert es ün dals gronds narratuors rumantschs; el ha descrit in seis raquints ed in seis roman «La müdada» (1962) la vita paurila al glim dal temp modern. Illa tradiziun da Men Rauch s'ha Cla Biert ingaschà pel mantegnimaint e per la renovaziun da la chanzun populara ed insembel cun Jon Semadeni per üna renaschentscha dal teater rumantsch.
